തർക്കത്തിൽ ഫലമില്ലെന്നും എല്ലാം പരാജയം മാത്രമാണെന്നും ബോധ്യപ്പെടുമ്പോൾ സത്യനിഷേധികൾ അമർഷം പ്രകടിപ്പിക്കുകയായി. അല്ലാഹു പറയുന്നു:

തീർച്ചയായും സത്യനിഷേധികളോട് ഇപ്രകാരം വിളിച്ചുപറയപ്പെടും: നിങ്ങൾ വിശ്വാസത്തിലേക്ക് ക്ഷണിക്കപ്പെടുകയും, എന്നിട്ട് നിങ്ങൾ അവിശ്വസിക്കുകയും ചെയ്തിരുന്ന സന്ദർഭത്തിൽ അല്ലാഹുവിന് (നിങ്ങളോടുള്ള) അമർഷം നിങ്ങൾ തമ്മിലുള്ള അമർഷത്തെക്കാൾ വലുതാകുന്നു.  (സൂറത്തുൽഗാഫിർ: 10)

ഭൗതിക ലോകത്ത് തനിക്ക് കൂട്ടായിരുന്നവരോടെല്ലാം അമർഷം കാണിക്കുകയും അവരെയെല്ലാം ശപിക്കുകയും അവർക്ക് വർദ്ധിച്ച ശിക്ഷ കൊടുക്കുവാൻ ആവശ്യപ്പെടുകയും ചെയ്യും. അല്ലാഹു പറയുന്നു:

അവരുടെ മുഖങ്ങൾ നരകത്തിൽ കീഴ്മേൽ മറിക്കപ്പെടുന്ന ദിവസം. അവർ പറയും: ഞങ്ങൾ അല്ലാഹുവെയും റസൂലിനെയും അനുസരിച്ചിരുന്നെങ്കിൽ എത്ര നന്നായിരുന്നേനെ! അവർ പറയും: ഞങ്ങളുടെ രക്ഷിതാവേ, ഞങ്ങൾ ഞങ്ങളുടെ നേതാക്കന്മാരെയും പ്രമുഖൻമാരെയും അനുസരിക്കുകയും, അങ്ങനെ അവർ ഞങ്ങളെ വഴിതെറ്റിക്കുകയുമാണുണ്ടായത്. ഞങ്ങളുടെ രക്ഷിതാവേ, അവർക്ക് നീ രണ്ടിരട്ടി ശിക്ഷ നൽകുകയും അവർക്ക് നീ വൻശാപം ഏൽപിക്കുകയും ചെയ്യണമേ (എന്നും അവർ പറയും)  (സൂറത്തുൽഅഹ്സാബ്: 66,67,68)

തങ്ങളെ വഴിതെറ്റിച്ചവരോടുള്ള ഒടുങ്ങത്ത അമർശവും അടങ്ങാത്ത ദേഷ്യവും കാരണത്താൽ അവരെ തങ്ങളുടെ കാൽക്കീഴിൽ ആക്കിത്തരുവാൻ അല്ലാഹുവോട് ആവശ്യപ്പെടും; ചവിട്ടിത്താഴ്ത്തി അവരോട് പകപ്പോക്കുവാനാണ് ഇപ്രകാരം ആവശ്യപ്പെടുന്നത്. അല്ലാഹു പറയുന്നു:

സത്യനിഷേധികൾ പറയും: ഞങ്ങളുടെ രക്ഷിതാവേ, ഞങ്ങളെ പിഴപ്പിച്ചവരായ ജിന്നുകളിൽ നിന്നും മനുഷ്യരിൽ നിന്നുമുള്ള രണ്ടു വിഭാഗത്തെ നീ ഞങ്ങൾക്ക് കാണിച്ചുതരേണമേ. അവർ അധമന്മാരുടെ കൂട്ടത്തിലാകത്തക്കവണ്ണം ഞങ്ങൾ അവരെ ഞങ്ങളുടെ പാദങ്ങൾക്ക് ചുവട്ടിലിട്ട് ചവിട്ടട്ടെ. (സൂറത്തുഫുസ്സ്വിലത്ത്: 29)

നരകാഗ്നിയിൽ എറിയപ്പെടുമ്പോഴാകട്ടെ അന്യോന്യമുള്ള ശാപവർഷം ഏറുകയും അവരിൽ ചിലർ മറ്റുള്ളവർക്ക് ശിക്ഷ കൂടുവാൻ ആഗ്രഹിക്കുകയും ചെയ്യും. അല്ലാഹു പറയുന്നു:

…ഓരോ സമൂഹവും (അതിൽ) പ്രവേശിക്കുമ്പോഴൊക്കെ അതിന്റെ സഹോദര സമൂഹത്തെ ശപിക്കും. അങ്ങനെ അവരെല്ലാവരും അവിടെ ഒരുമിച്ചുകൂടിക്കഴിഞ്ഞാൽ അവരിലെ പിൻഗാമികൾ അവരുടെ മുൻഗാമികളെപ്പറ്റി പറയും: ഞങ്ങളുടെ രക്ഷിതാവേ, ഇവരാണ് ഞങ്ങളെ വഴിതെറ്റിച്ചത്. അത് കൊണ്ട് അവർക്ക് നീ നരകത്തിൽ നിന്ന് ഇരട്ടി ശിക്ഷ കൊടുക്കേണമേ. അവൻ പറയും: എല്ലാവർക്കും ഇരട്ടിയുണ്ട്. പക്ഷെ നിങ്ങൾ മനസ്സിലാക്കുന്നില്ല. (സൂറത്തുൽഅഅ്റാഫ്: 38)

 

അബ്ദുൽ ജബ്ബാർ അബ്ദുല്ല