സ്വർഗ്ഗത്തിൽ പ്രവേശിക്കുന്ന വിശ്വാസികൾ അനുഭവിക്കുകയും ആസ്വദിക്കുകയും ചെയ്യുന്ന ഏറ്റവും വലിയ അനുഗ്രഹം അല്ലാഹുവിന്റെ തിരുമുഖ ദർശനമാണ്. തൽവിഷയത്തിൽ വന്ന ഹദീഥ് സ്വുഹയ്ബ് അർറൂമി رَضِيَ اللَّهُ عَنْهُ  യിൽനിന്ന് നിവേദനം ചെയ്യപ്പെട്ടിട്ടുണ്ട്. അല്ലാഹുവിന്റെ റസൂൽ ‎ﷺ പറഞ്ഞു:

“സ്വർഗ്ഗവാസികൾ സ്വർഗ്ഗത്തിൽ പ്രവേശിച്ചാൽ അല്ലാഹു പറയും: (ഞാൻ നിങ്ങൾക്ക് വല്ലതും അധികരിപ്പിച്ച് നൽകുവാൻ  നിങ്ങൾ ആഗ്രഹിക്കുന്നുവോ?) അപ്പോൾ അവർ പറയും: നീ ഞങ്ങളുടെ മുഖങ്ങളെ വെളുപ്പിച്ചില്ലേ? നീ ഞങ്ങളെ സ്വർഗ്ഗത്തിൽ പ്രവേശിപ്പിക്കുകയും നരകത്തിൽനിന്ന് മോചിപ്പിക്കുകയും ചെയ്തില്ലേ? തിരുമേനി ‎ﷺ പറഞ്ഞു: “അതോടെ അല്ലാഹു മറയെ നീക്കും. അതിൽപ്പിന്നെ തങ്ങളുടെ രക്ഷിതാവിലേക്ക് നോക്കുന്നതിനേക്കാൾ ഇഷ്ടകരമായ യാതൊന്നും അവർക്ക് നൽകപ്പെട്ടിട്ടുണ്ടാവില്ല”.  (മുസ്ലിം) 

സ്വർഗ്ഗത്തിൽ രക്ഷിതാവായ നാഥനെ കാണുകയെന്നത് സ്വർഗ്ഗീയാനുഗ്രഹങ്ങളിൽ പെട്ടതാണെന്നത് അഹ്ലുസ്സുന്നഃയുടെ അടിസ്ഥാന ആദർശമാണ്.  ഈ വിശ്വാസത്തെ പഠിപ്പിക്കുന്ന ചില പ്രമാണ വചനങ്ങളും പ്രമാണികരുടെ വിവരണങ്ങളും താഴെ നൽകുന്നു. 

അല്ലാഹു പറഞ്ഞു:

സുകൃതം ചെയ്തവർക്ക് ഏറ്റവും ഉത്തമമായ പ്രതിഫലവും(സ്വർഗ്ഗവും) വർദ്ധനവുമുണ്ട്  (വി. ക്വു. യൂനുസ്് : 26)   

സ്വുഹയ്ബ് അർറൂമി رَضِيَ اللَّهُ عَنْهُ  യിൽ നിന്ന് ഇമാം മുസ്ലിം നിവേദനം ചെയ്ത ഉപരി സൂചിത ഹദീഥിന്റെ ഒരു രിവായത്തിൽ:

“അതോടെ അല്ലാഹു മറയെ നീക്കും. അതിൽപ്പിന്നെ തങ്ങളുടെ രക്ഷിതാവിലേക്ക് നോക്കുന്നതിനേക്കാൾ ഇഷ്ടകരമായ യാതൊ ന്നും അവർക്ക് നൽകപ്പെട്ടിട്ടുണ്ടാവില്ല.)) എന്ന് പറഞ്ഞ ശേഷം തിരുമേനി ഈ ആയത്ത് (വി, ക്വു. യൂനുസ് :26) ഓതുകയുണ്ടായി എന്നുണ്ട്. 

അല്ലാഹു പറഞ്ഞു:

അവർക്കവിടെ ഉദ്ദേശിക്കുന്നതെന്തും ഉണ്ടായിരിക്കും. നമ്മുടെ പക്കലാകട്ടെ കൂടുതലുമുണ്ട്.  (വി, ക്വു. ക്വാഫ് : 35) 

ഈ ആയത്തിന്റെ തഫ്സീറായി അലിയ്യ് ഇബ്നു അബീ ത്വാലിബും رَضِيَ اللَّهُ عَنْهُ  അനസ് ഇബ്നു മാലികും رَضِيَ اللَّهُ عَنْهُ  പറഞ്ഞു: “പ്രതാപിയും ഉന്നതനുമായ അല്ലാഹുവിന്റെ തിരുമുഖത്തേക്കുള്ള നോട്ടമാകുന്നു കൂടുതലുള്ളത് ”       

അല്ലാഹു പറഞ്ഞു:

ചില മുഖങ്ങൾ അന്ന് പ്രസന്നതയുള്ളതും  അവയുടെ രക്ഷിതാ വിന്റെ നേർക്ക് ദൃഷ്ടി തിരിച്ചവയുമായിരിക്കും.  (വി, ക്വു. അൽ ക്വയാമഃ : 22, 23) 

ഈ ആയത്തിന്റെ തഫ്സീറായി ഇബ്നു അബ്ബാസ് رَضِيَ اللَّهُ عَنْهُ  പറഞ്ഞു: “പ്രതാപിയും ഉന്നതനുമായ തങ്ങളുടെ രക്ഷിതാവിലേക്ക് നോക്കും” 

ഉപരിസൂചിത ആയത്തിന്റെ വിഷയത്തിൽ, അല്ലാഹുവിന്റെ പ്രതിഫലത്തിലേക്ക് നോക്കും എന്ന് ഒരു വിഭാഗം പറയുന്നത് ഇമാം മാലികിനോട് പറയപ്പെട്ടു. അപ്പോൾ അദ്ദേഹം പറഞ്ഞു: അവർ പറഞ്ഞത് കള്ളമാണ്. എങ്കിൽ താഴെ വരുന്ന അല്ലാഹുവിന്റെ വചനത്തോട് അവരുടെ നിലപാട് എന്താണ്? അല്ലാഹു പറയുന്നു:

അല്ല; തീർച്ചയായും അവർ അന്നേ ദിവസം അവരുടെ രക്ഷിതാവിൽ നിന്ന് മറയ്ക്കപ്പെടുന്നവരാകുന്നു.
(വി, ക്വു. അൽമുത്വഫ് ഫിഫീൻ:15)

ഇമാം മാലിക് തുടർത്തി പറഞ്ഞു: “ആളുകൾ തങ്ങളുടെ നേത്രങ്ങൾകൊണ്ട് അന്ത്യനാളിൽ അല്ലാഹുവിലേക്ക് നോക്കും. വിശ്വാസികൾ അന്ത്യനാളിൽ തങ്ങളുടെ രക്ഷിതാവിനെ കാണുമായിരുന്നില്ലെങ്കിൽ അവിശ്വാസികൾ മറക്കപ്പെടുന്നതിനെ കുറിച്ച് അല്ലാഹു വിവരിക്കുമായിരുന്നില്ല.”

അബൂഹുറയ്റ رَضِيَ اللَّهُ عَنْهُ  യിൽനിന്ന് നിവേദനം. അദ്ദേഹം പറഞ്ഞു:

“നിശ്ചയം ജനങ്ങൾ ചോദിച്ചു: അല്ലാഹുവിന്റെ തിരുദൂതരേ, ഞങ്ങൾ ഞങ്ങളുടെ രക്ഷിതാവിനെ അന്ത്യനാളിൽ കാണുമോ? അ പ്പോൾ അല്ലാഹുവിന്റെ റസൂൽ ‎ﷺ പറഞ്ഞു: “പൗർണ്ണമിരാവിൽ ചന്ദ്രനെ (കാണുന്നതിൽ) നിങ്ങൾക്ക് വിഷമം ഉണ്ടാകുമോ?”  അവർ പറഞ്ഞു: അല്ലാഹുവിന്റെ തിരുദൂതരേ, ഇല്ല. റസൂൽ ‎ﷺ പറഞ്ഞു: “കാർമേഘം മറയിട്ടില്ലായെങ്കിൽ സൂര്യനെ (കാണുന്നതിൽ) നിങ്ങൾക്ക് വിഷമം ഉണ്ടാകുമോ?” അവർ പറഞ്ഞു: അല്ലാഹുവിന്റെ തിരുദൂതരേ, ഇല്ല. റസൂൽ ‎ﷺ പറഞ്ഞു: “നിശ്ചയം, നിങ്ങൾ അപ്ര കാരം അല്ലാഹുവിനെ കാണും….” (ബുഖാരി)

 

അബ്ദുൽ ജബ്ബാർ അബ്ദുല്ല