അല്ലാഹു മുഴുജനങ്ങളേയും അന്ത്യനാളിൽ ഒരുമിച്ച് കൂട്ടുന്നതാണ്. എല്ലാവരേയും ഒരുമിച്ച് കൂട്ടുന്ന വേദിയാണ് മഹ്ശർ. അല്ലാഹു പറഞ്ഞു:

 ذَٰلِكَ يَوْمٌ مَّجْمُوعٌ لَّهُ النَّاسُ وَذَٰلِكَ يَوْمٌ مَّشْهُودٌ ‎﴿١٠٣﴾‏ 

സർവ്വ മനുഷ്യരും സമ്മേളിപ്പിക്കപ്പെടുന്ന ഒരു ദിവസമാണത്. (സർവ്വരുടെയും) സാന്നിദ്ധ്യമുണ്ടാകുന്ന ഒരുദിവസമാകുന്നു അത്.  (സൂറത്തു ഹൂദ്: 103)

പൂർവ്വികന്മാരും പിൽകാലക്കാരും ഒരുപോലെ ഒരുമിച്ച് കൂട്ടപ്പെടും. അല്ലാഹു പറഞ്ഞു:

നീ പറയുക: തീർച്ചയായും പൂർവ്വികരും പിൽക്കാലക്കാരും എല്ലാം ഒരു നിശ്ചിത ദിവസത്തെ കൃത്യമായ ഒരു അവധിക്ക് ഒരുമിച്ചു കൂട്ടപ്പെടുന്നവർ തന്നെയാകുന്നു. (സൂറത്തുൽ വാക്വിഅഃ:49,50)

എല്ലാവരേയും എല്ലാത്തിനേയും വലയം ചെയ്ത് നിൽക്കുന്ന അല്ലാഹുവിന്റെ കഴിവിനാൽ എവിടെയാണെങ്കിലും അവരെ മഹ്ശറിലേക്ക് അവൻ കൊണ്ടുവരുന്നതാണ്. അല്ലാഹു പറഞ്ഞു:

 أَيْنَ مَا تَكُونُوا يَأْتِ بِكُمُ اللَّهُ جَمِيعًا ۚ إِنَّ اللَّهَ عَلَىٰ كُلِّ شَيْءٍ قَدِيرٌ ‎﴿١٤٨﴾‏ 

നിങ്ങൾ എവിടെയൊക്കെയായിരുന്നാലും അല്ലാഹു നിങ്ങളെയെല്ലാം ഒന്നിച്ചു കൊണ്ടുവരുന്നതാണ്.തീർച്ചയായും അല്ലാഹു ഏത് കാര്യത്തിനും കഴിവുള്ളവനാകുന്നു.  (സൂറത്തുൽ ബക്വറഃ: 148)

മഹ്ശറിൽ നിന്ന് ഒരാളും തെന്നുകയോ വഴിമാറുകയോ ഇല്ല. നാഥനായ അല്ലാഹു എല്ലാവരേയും എണ്ണുകയും ക്ലിപ്തപ്പെടുത്തുകയും ചെയ്തിരിക്കെ ആരും ഒറ്റപ്പെടുന്ന അവ സ്ഥയുണ്ടാവുകയുമില്ല.
അല്ലാഹു പറഞ്ഞു:

 إِن كُلُّ مَن فِي السَّمَاوَاتِ وَالْأَرْضِ إِلَّا آتِي الرَّحْمَٰنِ عَبْدًا ‎﴿٩٣﴾‏ لَّقَدْ أَحْصَاهُمْ وَعَدَّهُمْ عَدًّا ‎﴿٩٤﴾‏ وَكُلُّهُمْ آتِيهِ يَوْمَ الْقِيَامَةِ فَرْدًا ‎﴿٩٥﴾‏

ആകാശങ്ങളിലും ഭൂമിയിലുമുള്ള ഏതൊരാളും ഒരു ദാസനെ ന്ന നിലയിൽ പരമകാരുണികന്റെ അടുത്ത് വരുന്നവൻ മാത്രമായിരിക്കും.തീർച്ചയായും അവരെ അവൻ തിട്ടപ്പെടുത്തുകയും എണ്ണികണക്കാക്കുകയും ചെയ്തിരിക്കുന്നു. അവരോരോരുത്തരും ഉയിർത്തെഴുന്നേൽപിന്റെ നാളിൽ ഏകാകിയായിക്കൊണ്ട് അവന്റെ അടുക്കൽ വരുന്നതാണ്.  (സൂറത്തുമർയം: 93,94,95)

മൃഗങ്ങൾ വരെ മഹ്ശറിൽ എത്തിക്കപ്പെടുന്നതാണ്. അല്ലാഹു പറഞ്ഞു:

وَمَا مِن دَابَّةٍ فِي الْأَرْضِ وَلَا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُم ۚ مَّا فَرَّطْنَا فِي الْكِتَابِ مِن شَيْءٍ ۚ ثُمَّ إِلَىٰ رَبِّهِمْ يُحْشَرُونَ ‎﴿٣٨﴾‏ 

ഭൂമിയിലുള്ള ഏതൊരു ജന്തുവും, രണ്ട് ചിറകുകൾ കൊണ്ട് പറക്കുന്ന ഏതൊരു പക്ഷിയും നിങ്ങളെപ്പോലെയുള്ള ചില സമൂഹങ്ങൾ മാത്രമാകുന്നു. ഗ്രന്ഥത്തിൽ നാം യാതൊന്നും വീഴ്ചവരുത്തിയിട്ടില്ല. പിന്നീട് തങ്ങളുടെ രക്ഷിതാവിങ്കലേക്ക് അവർ ഒരുമിച്ചു കൂട്ടപ്പെടുന്നതാണ്.  (സൂറത്തുൽഅൻആം: 38)

وَمِنْ آيَاتِهِ خَلْقُ السَّمَاوَاتِ وَالْأَرْضِ وَمَا بَثَّ فِيهِمَا مِن دَابَّةٍ ۚ وَهُوَ عَلَىٰ جَمْعِهِمْ إِذَا يَشَاءُ قَدِيرٌ ‎﴿٢٩﴾‏

ആകാശങ്ങളും ഭൂമിയും സൃഷ്ടിച്ചതും അവ രണ്ടിലും ജീവ ജാലങ്ങളെ വ്യാപിപ്പിച്ചതും അവന്റെ ദൃഷ്ടാന്തങ്ങളിൽ പെട്ടതത്രെ. അവൻ ഉദ്ദേശിക്കുമ്പോൾ അവരെ ഒരുമിച്ചു കൂട്ടുവാൻ കഴിവുള്ളവനാണ് അവൻ. (സൂറത്തുശ്ശൂറാ: 29)

وَإِذَا الْوُحُوشُ حُشِرَتْ ‎﴿٥﴾‏

വന്യമൃഗങ്ങൾ ഒരുമിച്ചുകൂട്ടപ്പെടുമ്പോൾ (സൂറത്തുത്തക്’വീർ:5)