സ്വർഗ്ഗത്തിൽ പ്രവേശിക്കുകയും അനുഗ്രഹങ്ങളിൽ ഇടം കാണുകയും ചെയ്യുന്ന മുമ്പന്മാരെക്കുറിച്ച് വന്നതായ ഏതാനും തിരുമെഴികൾ ഉണർത്തുന്നു. 

അബ്ദുല്ലാഹിബ്നു അംറി رَضِيَ اللَّهُ عَنْهُ ൽനിന്ന് നിവേദനം. അല്ലാഹുവിന്റെ റസൂൽ ‎ﷺ പറഞ്ഞു: 

“നിശ്ചയം, അന്ത്യനാളിൽ മുഹാജിരീങ്ങളിലെ ദരിദ്രന്മാർ ധനികന്മാരെക്കാൾ  നാൽപ്പത് വർഷം മുമ്പ് സ്വർഗ്ഗത്തിലേക്ക് പ്രവേശിക്കും”  (മുസ്ലിം)

അബ്ദുല്ലാഹിബ്നു അംറി رَضِيَ اللَّهُ عَنْهُ ൽനിന്ന് നിവേദനം. അദ്ദേഹം പറഞ്ഞു. അല്ലാഹുവിന്റെ റസൂൽ ‎ﷺ എന്നോട് ചോദിച്ചു: 

“താങ്കൾക്ക് അറിയുമോ എന്റെ ഉമ്മത്തികളിൽ സ്വർഗ്ഗത്തിൽ പ്രവേശിക്കുന്ന ആദ്യ കൂട്ടം ആരെന്ന്? ഞങ്ങൾ പറഞ്ഞു: അല്ലാഹുവും അവന്റെ തിരുദൂതരുമാണ് നന്നായി അറിയുന്നവർ. അപ്പോൾ തിരുമേനി ‎ﷺ  പറഞ്ഞു: മുഹാജിറുകളിലെ സാധുക്കൾ. അവർ അന്ത്യനാളിൽ സ്വർഗ്ഗകവാടത്തിൽ എത്തുകയും തുറക്കുവാൻ ആവശ്യപ്പെടുകയും ചെയ്യും. അപ്പോൾ അവരോട് സ്വർഗ്ഗത്തിന്റെ കാവൽകാർ ചോദിക്കും: നിങ്ങൾ വിചാരണക്കെടുക്കപ്പെട്ടുവോ? അവർ പറയും: എന്ത് കൊണ്ടാണ് ഞങ്ങൾ വിചാരണക്കെടുക്കപ്പെടുന്നത്? നിശ്ചയം ഞങ്ങളുടെ വാളുകൾ, മരണം വരിക്കുന്നതുവരെ അല്ലാഹുവിന്റെ മാർഗ്ഗത്തിൽ ഞങ്ങളുടെ ചുമലകളിൽ തൂക്കപ്പെട്ടതായിരുന്നു. അപ്പോൾ അവർക്ക് തുറക്കപ്പെടും. അങ്ങിനെ ജനങ്ങൾ സ്വർഗ്ഗത്തിൽ പ്രവേശിക്കുന്നതിന്റെ നാൽപ്പത് വർഷം മുമ്പുതന്നെ അവർ അതിൽ വിശ്രമിക്കും” 

ഥൗബാനി رَضِيَ اللَّهُ عَنْهُ ൽനിന്ന് നിവേദനം. അദ്ദേഹം പറഞ്ഞു: 

ഞാൻ അല്ലാഹുവിന്റെ റസൂലി ‎ﷺ ന്റെ അടുക്കൽ നിൽക്കുകയായിരുന്നു. അപ്പോൾ ജൂതപുരോഹിതന്മാരിൽനിന്നും ഒരു പുരോഹി തൻ വന്നു. … ജൂതൻ ചോദിച്ചു: ആദ്യമായി സ്വർഗ്ഗ പ്രവേശനത്തിന് അനുവാദം ആർക്കാണ്? തിരുമേനി ‎ﷺ പറഞ്ഞു: മുഹാജിറുകളിലെ സാധുക്കൾക്ക്…  (മുസ്ലിം)

ഉസാമയി رَضِيَ اللَّهُ عَنْهُ ൽനിന്ന് നിവേദനം. അല്ലാഹുവിന്റെ റസൂൽ ‎ﷺ പറഞ്ഞു: 

“ഞാൻ സ്വർഗ്ഗകവാടത്തിങ്കൽ നിന്നു. അപ്പോൾ സ്വർഗ്ഗത്തിൽ പ്രവേശിച്ചവരിൽ കൂടുതലും സാധുക്കളായിരുന്നു. (മുസ്ലിംകളിലെ) സമ്പന്നർ തടയപ്പെട്ടവരാണ്. എന്നാൽ, നരകത്തിന്റെ വാക്താക്കളെ നരകത്തിലേക്ക് കൽപ്പിക്കപ്പെട്ടിരുന്നു. ഞാൻ നരകകവാടത്തിങ്കൽ നിന്നു. അപ്പോൾ നരകത്തിൽ പ്രവേശിച്ചവരിൽ കൂടു തലും സ്ത്രീകളായിരുന്നു” (ബുഖാരി)